දිනය වෙනස් කරන්න අලුත් ගැසට්ටුවක්
ජාතික පාසල් සඳහා ගුරුවරු බඳවා ගැනීමට අදාළ නඩු තීන්දුවේ සඳහන් දිනය වෙනස් කිරීම සම්බන්ධව අධ්යාපන අමාත්යාංශය සලකා බලා අලුත් ගැසට්ටුවක් නිකුත් කරනු ඇතැයි විදේශ කටයුතු, විදේශ රැකියා සහ සංචාරක ඇමැති විජිත හේරත් මහතා පැවසීය.
රජයේ ප්රවෘත්ති දෙපාර්තමේන්තුවේ ඊයේ (17) කැබිනට් තීරණ දැනුම්දීමේ මාධ්ය හමුවේදී ඇමැතිවරයා මේ බව කියා සිටියේය. විශාල පිරිසකගේ ඉල්ලීමක් තිබෙනවා එම දිනය පිළිබඳ සලකා බලන්න යැයි ද හෙතෙම කීවේය.
ඇමැතිවරයා වැඩිදුරටත් මෙසේද පැවසීය.
“නඩු තීන්දුවක් තියෙනවා. නඩු තීන්දුවේ දිනයක් සඳහන් වෙලා තිබුණා. ඒ අනුව තමයි මුලින් ගැසට් එක නිකුත් වුණේ. ඒක වෙනස් කිරීම සඳහා වූ යෝජනාවක් අධ්යාපන අමාත්යාංශයෙන් ඉදිරිපත් වෙලා තිබෙනවා. ඉදිරියේ දී අධ්යාපන අමාත්යාංශයෙන් ඒ පිළිබඳ ක්රියාමාර්ග ගනී. ඒක තමයි නඩු තීන්දුවේ තිබුණ දිනය.
නඩු තීන්දුවෙන් නිශ්චිතව පැහැදිලිව කියලා තිබුණා. ඒ අනුව තමයි ගැසට් එක පසුගිය ජූනි 30ට පෙර ගහලා තිබුණේ. නමුත් විශාල පිරිසකගේ ඉල්ලීමක් තිබුණා. ඉල්ලීම අනුව අධ්යාපන අමාත්යාංශය සලකා බලනවා. බලලා ඒ ගැන තීරණය අරගෙන අලුතෙන් ගැසට් එකක් නිකුත් කරයි.”
