ලිට්‍රෝ ගෑස් ගැන රජයෙන් විශේෂ දැනුම්දීමක්

ලිට්‍රෝ ගෑස් ලංකා සමාගමට අවශ්‍ය LPG සිලින්ඩර මිලදී ගැනීමට ශ්‍රී ලංකා රජය අනුමැතිය ලබා දී තිබේ.

මෙම ප්‍රසම්පාදනයට කපාට රහිත LPG සිලින්ඩර වර්ග හතරක් ඇතුළත් වන අතර, කිලෝග්‍රෑම් 2.3 සිලින්ඩර 120,000ක්, කිලෝග්‍රෑම් 5 සිලින්ඩර 185,000ක්, කිලෝග්‍රෑම් 12.5 සිලින්ඩර 450,000ක් සහ කිලෝග්‍රෑම් 37.5 සිලින්ඩර 7,000ක් මිලදී ගැනීමට නියමිතය.

2025–2027 කාලය ආවරණය වන මෙම සැපයුම සඳහා ශ්‍රී ලංකා ප්‍රමිති ආයතනයේ (SLSI) ලියාපදිංචි සැපයුම්කරුවන්ගෙන් ජාත්‍යන්තර තරඟකාරී ලංසු කැඳවා තිබූ අතර, ලංසු හයක් ලැබී ඇති බව වාර්තා වේ.

ලංසු තක්සේරු කිරීමෙන් පසුව, මුදල්, ජාතික ප්‍රතිපත්ති සැලසුම් සහ ආර්ථික සංවර්ධන අමාත්‍යවරයා ලෙස ගරු ජනාධිපතිතුමා විසින් ඉදිරිපත් කළ යෝජනාව මත පදනම්ව මෙම අනුමැතිය හිමිව ඇත.

දේශීය ඉල්ලුම සම්පූර්ණයෙන්ම සපුරාලීමට සහ රට පුරා සුමට බෙදාහැරීමක් පවත්වා ගැනීමට ප්‍රමාණවත් LPG සිලින්ඩර සැපයුමක් සහතික කිරීම මෙම ප්‍රසම්පාදනයේ ප්‍රධාන අරමුණ වේ.

මෙම තීරණය ලිට්‍රෝ ගෑස් පරිභෝජකයින්ට අඛණ්ඩ සැපයුමක් ලබාදීමට සහ ගෑස් හිඟයක් ඇතිවීම වැළැක්වීමට දායක වනු ඇතැයි අපේක්ෂා කෙරේ.