“බේරේ බේරාගමු” මෙහෙයුම් ව්‍යාපෘතියක් ඇරඹේ
කොළඹ නගරයේ හදවත බඳු බේරේ වැව සහ ඇළ මාර්ග පිරිසිදුකර සංවර්ධනය කිරීමේ “බේරේ බේරාගමු” ව්‍යාපෘතියේ සමාරම්භක උත්සවය පසුගිය 07 වැනි බ්‍රහස්පතින් දා බේරේ වැව සීමාමාලකයේ දී පැවැත්විය. ඒ ගංගාරාම විහාරාධිකාරි ආචාර්ය කිරින්දේ අස්සජි හිමියන්ගේ අනුශාසකත්වයෙන් සහ අග්‍රාමාත්‍ය දිනේෂ් ගුණවර්ධන මහතාගේ ප්‍රධානත්වයෙන් මෙන්ම වරාය, නාවික හා ගුවන් සේවා අමාත්‍ය නිමල් සිරිපාල ද සිල්වා, නාගරික සංවර්ධන හා නිවාස අමාත්‍ය ප්‍රසන්න රණතුංග, පරිසර අමාත්‍ය නසීර් අහමඩ් යන අමාත්‍යවරුන්ගේ ද සහභාගීත්වයෙන් යුතුවය. ඊට අමතරව දෙස් විදෙස් සම්භාවනීය අමුත්තන් 150ක් පමණ මෙම සමාරම්භක උළෙලට සහභාගීවීය.
ශ්‍රී ලංකා ඉඩම් සංවර්ධනය කිරීමේ සංස්ථාව, ශ්‍රී ලංකා වරාය අධිකාරිය, නාගරික සංවර්ධන අධිකාරිය, මධ්‍යම පරිසර අධිකාරිය, ශ්‍රී ලංකා දේශගුණික අරමුදල (පුද්ගලික) සමාගම සහ කොළඹ මහ නගර සභාව නියෝජනය කරමින් මෙහි අධීක්ෂණ කටයුතු සිදුකන අතර එම ආයතන මගින් නම් කරන නියෝජිතයන්ට අදාළ ව්‍යාපෘතිය සඳහා ව්‍යාපෘති සමාගමට අවශ්‍ය උපදෙස් සහ පහසුකම් සැලසීමේ කාර්යය පවරා ඇත. මෙම ව්‍යාපෘතියේ ව්‍යාපෘති යෝජක ලෙස GROEPO Pte.Ltd. සමාගමේ දේශීය සමාගම වන GROEPO Lanka Bioscience (Pvt) Ltd ආයතනය කටයුතු කරයි.
වසර 20ක් සඳහා බලපැවැත්වෙන මෙම නියමු ව්‍යාපෘතිය යටතේ යන්ත්‍ර 40ක් ස්ථාපිත කිරීමට නියමිතව ඇති අතර ඒ සඳහා මූලික ප්‍රාග්ධන ආයෝජනය සහ තාක්ෂණික දැනුම ජපානයේ GROEPO Pte.Ltd. පෞද්ගලික ආයතනය විසින් සපයනු ලබන අතර එය අමෙරිකානු ඩොලර් මිලියන 03ක් වේ.
අහිතකර මිනිස් ක්‍රියාකාරකම් හේතුවෙන් අඩ සියවසක කාලයක් පුරා ක්‍රමක්‍රමයෙන් දූෂණයට ලක්වෙමින් පවතින බේරේ වැවේ ජලය පිරිසිදු කර එහි දුඟද නැති කිරීමටත් එම තත්ත්වය දිගටම පවත්වාගෙන යාමටත් ජලයේ ගුණාත්මකභාවය නඩත්තු කිරීමත් සමඟ සංවර්ධන කටයුතු සඳහා යොදාගැනීමත් මෙම ව්‍යාපෘතියෙන් අපේක්ෂා කරයි. මෙම ව්‍යාපෘතියට සමගාමීව බේරේ වැවට මලපවහන අපජලය සහ අපද්‍රව්‍ය බැහැර කරන මාර්ග හඳුනාගෙන ඒ සඳහා විකල්ප ක්‍රමවේදයන් හඳුන්වාදීමට ද කටයුතු කරයි.
ශ්‍රී ලංකා රජයේ කිසිදු මුදල් ආයෝජනයකින් තොරව සිදුවන මෙම ව්‍යාපෘතිය ජපන් රජයෙන් මෙරටට තිළිණ කරන්නේ කෘතගුණ සැලකීමක් සහ වත්මන් මූල්‍ය අර්බුදයෙන් ගොඩ ඒමට සහය පලකිරීමක් ද ලෙසිනි.
ඒ 1951 වර්ෂයේ සෙන් ෆැන්සිස්කෝ නුවර පැවැති ජාත්‍යන්තර සම්මේලනයේ දී ජපන් ජාතිකයින්ට දඩුවම් කිරීමට එරෙහිව හිටපු ජනාධිපති ජේ. ආර්. ජයවර්ධන මහතා පැවැත්වූ දේශනාවත්, වත්මන් ජනාධිපති රනිල් වික්‍රමසිංහ මහතා මෙරට පවතින මූල්‍යමය අර්බුදයෙන් රට ගොඩගැනීමට දරන උත්සාහයත් අයගමිනි.
