පළාත් සභා රෝහල් රජයට පවරා නොගන්නා බව සෞඛ්‍ය ඇමැති කියයි

Share Button

පළාත් සභා රෝහල් රැසක් රජයට පවරා ගන්නා ලෙසට යෝජනා ඉදිරිපත් වුවත්, එය ක්‍රියාත්මක නොකරන බව සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා ප්‍රකාශ කරයි.

නැගෙනහිර පළාත් සභාව ප්‍රථම වරට සංවිධානය කළ අන්තර්ජාතික ආයුර්වේද ප්‍රදර්ශණය විවෘත කිරීමේ අවස්ථාවට එක්වෙමින් සෞඛ්‍ය අමාත්‍යවරයා මේ බව ප්‍රකාශ කළේය.

දේශීය වෛද්‍ය ක්‍රමය, යුනානි සහ සිද්ධි වෛද්‍ය ක්‍රම ප්‍රචලිත කිරීමේ අරමුණින් මෙම අන්තර්ජාතික ප්‍රදර්ශණය පැවැත්විනි.

මෙහිදී වැඩිදුරටත් අදහස් දැක් වූ සෞඛ්‍ය අමාත්‍යවරයා පළාත් සභා සෞඛ්‍ය අමාත්‍යවරුන්ගේ හා දේශීය වෛද්‍ය අමාත්‍යවරුන්ගේ සමුළුවල දී පළාත් රෝහල් සේවා මුහුණ දෙන ගැටලු පිළිබද සාකච්ඡා කරන බවත් රෝගී සත්කාරක සේවා සිදු කිරීමේ දී සියලු රෝහලක්ම සංවර්ධනය කළ යුතු බවත් පැවසිය.

තවද ප්‍රතිකාර ලබාගැනීමට පැමිණෙන රෝගියා රෝහල මධ්‍යම රජයේ ද පළාත් සභාවේ ද කියා නොදන්නා බවත් ඔවුන් පැමිණෙන්නේ ප්‍රතිකාර ලබාගැනීමට බැවින් එම සේවාව නිසිපරිදි ලබාදිය යුතු බව අවධාරණය කළේය.

බලය බෙදාහැරීම තම ප්‍රතිපත්තිය බව පැවසු හෙතෙම ඒ අනුව පළාත් සභා රෝහල් ද සංවර්ධනය කිරීම සදහා අවශ්‍ය ප්‍රතිපාදන පසුගිය වසර 03 තුළ ම ලබාදී තිබෙන බවත් දේශීය වෛද්‍ය ක්‍රමය නගා සිටුවීම සදහා පියවර රැසක් ගෙන ඇති බවත් දේශීය වෛද්‍ය ක්‍රමය ප්‍රචලිත කිරීම තුලින් විශාල විදේශ විනිමයක් ලබාගත හැකි බවත් එහිදී පෙන්වා දුන්නේය.

මෙහිදී දේශීය වෛද්‍ය ක්‍රමය නගා සිටුවීම සඳහා සෞඛ්‍ය අමාත්‍යවරයා ගත් තීන්දු තීරණ අගය කරමින් නැගෙනහිර පළාත් සභාව විසින් සම්මානයක් ද පිරිනමන ලදි.

මෙම අවස්ථාවට නැගෙනහිර පළාත් සභාවේ ආණ්ඩුකාර රෝහිත බෝගොල්ලාගම, නැගෙනහිර ආයුර්වේද කොමසාරිස් ආර්.සීතරන් මහත්මිය, නැගෙනහිර විශ්ව විද්‍යාලයේ මහාචාර්යවරු සහ ආචාර්යවරු එක්ව සිටියහ.

Share Button

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *